بزم غوثیہ نعت انٹرنیشنل

بزم غوثیہ نعت انٹرنیشنل

ایک تعارف:

یہ ایک ناقابل تردید حقیقت ہے کہ نعت صدیوں کا سفر طے کرتے ہوئے آج انتہائی نقطہ عروج کو چھو رہی ہے۔ یہ نعت کی ہمہ گیری اور فیضان عام ہے کہ آج کا دور اپنی مادیت پسندی سے بےزاری کا اظہار کرکے نعت کے وسیلے سے حضور کے دامنِ رحمت میں پناہ ڈھونڈ رہا ہے اور یہ ہمارے عہد کی مجبوری نہیں بلکہ افتخار ہے کہ وہ اپنی تشخیص کا احساس نعت کے حوالے سے دلانا چاہتا ہے۔

حضور کی مدحت و نعت کا تصور کرتے ہی ہمارے دل و جان خوشبوئے عقیدت میں بسنے اور محسوسات کے شہ پارے کی صورت میں رواں امنڈنے لگتے ہیں۔ فکر کو معرفت کا گداز اور روح کو راحت و آرام سہرانے لگتا ہے۔ یہی وجہ ہے کہ آج نعت ہمارے اجتماعی مزاج کا حصہ بن چکی ہے۔ ایک طرف یہ شعر و ادب کا محبوب و لامحدود موضوع کی صورت اختیار کرچکی ہے اور دوسری طرف عشاقانِ نبی کریم کی روحانی تسکین کے لیے محافل کی صورت میں روزا فزوں ترقی کر رہی ہے۔ بزم غوثیہ نعت انٹرنیشنل کے قیام کا مقصد بھی حضور کریم کے ذکر کا فروغ ہے۔ یوں تو بزم کے ارکان کو تقریباً دو دہائیوں سے محافل نعت و عرس شریف کی محافل منعقد کرنے کی سعادت حاصل ہے، لیکن تنظیمی سطح پر اس کی تشکیل کا سہرا حضرت علامہ قاری حمید الرحمن نقشبندی رحمتہ اللہ علیہ کے سر ہے۔ انہوں نے ہمیشہ بزم کے کارکنوں کا حوصلہ بڑھایا اور ان کی کارکردگی پر خصوصی شفقت و توجہ کا مظاہرہ کرکے کارکنوں میں مزید بہتر انداز میں کام کرنے کے جذبے کو پروان چڑھایا۔

بزم غوثیہ کے چند نمایاں پروگرام:

بزم غوثیہ نے نعت خوانی کے فروغ کے لیے دیگر کئی پروگراموں کے علاوہ جن نمایاں پروگراموں کا انعقاد کیا، وہ درج ذیل ہیں، 1997ءمیں بزم غوثیہ نے ملک کے نامور و سینئر نعت خواں الحاج سعید ہاشمی کی سلور جوبلی کے سلسلے میں ایک عظیم الشان روح پرور محفل کا انعقاد کیا جس کو کافی سراہا گیا۔

بزم غوثیہ کو اللہ رب العزت کے کرم سے یہ اعزاز اور اولیت بھی حاصل ہے کہ اس نے دنیائے اسلام میں پہلی مرتبہ نعت خوانی کو ویڈیو کیسٹ پر متعارف کرایا۔ عالمی شہرت یافتہ نعت خواں الحاج سعید ہاشمی کی سلور جوبلی کے سلسلے میں ایک عظیم الشان روح پرور محفل کا انعقاد کیا۔

بزم غوثیہ نے اپنے پروگراموں میں خصوصاً ریکارڈنگ کے پروگراموں میں سینئر نعت خواں حضرات کے ساتھ ساتھ نئے نعت خوانوں کو بھی متعارف کروانے کی بھرپور کوشش کی ہے اور یہ سلسلہ جاری و ساری ہے۔

بزم غوثیہ ہر سال بڑے مرکزی پروگراموں کا انعقاد کرتی ہے جبکہ مرکزی پروگرام ملیر کراچی میں اور مزید دوسرے پروگرام شہر کے مختلف مقامات پر کرتی ہے۔ ان محافل نعت میں پاکستان بھر کے کم و بیش تمام نعت خواں، علمائے کرام اور اناﺅنسر اور شعراءحضرات شرکت کرتے رہے ہیں اور یہ سلسلہ جاری ہے۔

بزم غوثیہ کے زیر اہتمام جن نعت خوانوں نے شرکت کی، ان کے نام: الحاج سعید ہاشمی، قاری وحید ظفر قاسمی، الحاج صدیق اسماعیل، الحاج یوسف میمن، الحاج سید فصیح الدین الدین سہروردی، الحاج اویس رضا قادری، الحاج خورشید احمد، سید صبیح الدین رحمانی، زبیر مکی، عبدالحمیدرانا، راشد اعظم، شاہد قادری، فخر الدین قادری، فیروز سہروردی، نثار معرفانی، ریحان قادری، قاری اسد الحق، رفاقت رحمانی، قاری فرحان رحمانی، قاری آصف یار خان، مکرم علی خان ، رئیس احمد، ظفر اقبال پٹنی، ندیم خان، شکیل مدنی، محمد سعید۔

بیرون کراچی سے مدعو نعت خواں:

حافظ مرغوب ہمدانی، پروفیسر عبدالرﺅف روفی، اختر قریشی، قاری کرامت نعیمی، عبدالمجیدسندھو(مرحوم)، منیر ہاشمی ، علیم الدین علیم، عابد رﺅف قادری۔

نعت گو شعراءحضرات:

اقبال عظیم، مسرور کیفی(مرحوم)، سید خالد محمود نقشبندی، سید صبیح الدین رحمانی، عابد بریلوی، دبئی سے مقصود تبسم۔

نقیب محفل

صاحبزادہ شہریار قدوسی، سید آصف مظہر (مرحوم)، عامر اسحاق سہروردی، صاحبزادہ تسلیم احمد صابری، فصیح الدین عرشی، افسر شیخ، فدا حسین گیلانی، سمیع اللہ حسینی، سمیع مجاہد، سید ابرار احمد، محمد علی گوہر۔

اراکین بزم کی خواہش ہے کہ نعت خوانی کے ساتھ ساتھ سماجی بھلائی کے کام بھی کیے جائیں اور اس سلسلے میں ایک ڈسپنسری ، ایمبولینس سروس، میت بس اور جدید طرز پر مدرسہ کا قیام۔ اللہ تعالیٰ کے فضل و کرم سے مسجد غوثیہ کی تعمیر و توسیع کے بعد مدرسہ کی تعمیر کا کام جاری ہے۔ پہلی اور دوسری منزل کی تکمیل کے بعد درس و تدریس کا سلسلہ شروع ہوچکا ہے۔ اس مدرسہ میں دینی و دنیاوی تعلیم کے ساتھ مدرسہ بینات میں بھی تعلیم کا سلسلہ جاری و ساری ہے۔

ہم سب اللہ ربّ العزت سے تہہ دل ، عاجزی سے دعا گو ہیں کہ اللہ تعالیٰ اپنے حبیب محمد کے صدقے خلوص نیت عطا فرمائے۔ ہمارے اخلاص میں برکت عطا فرمائے۔ ہمارے نیکی کے کاموں میں مزید ہمت و طاقت عطا فرمائے اور ہمیں عاجزی سے سارے کام کرنے کی توفیق عطا فرمائے (آمین)۔